ୱାଶିଂଟନ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୀତି ବିରୋଧରେ ଶନିବାର ଦିନ ୱାଶିଂଟନ, ଡି.ସି, ନ୍ୟୁୟର୍କ, ଚିକାଗୋ ଏବଂ ଲସ୍ ଆଞ୍ଜେଲସ୍ ସମେତ ଅନେକ ଆମେରିକୀୟ ସହରରେ ଲକ୍ଷ ଲକ୍ଷ ଲୋକ ଏକାଠି ହୋଇଥିଲେ।
ସେମାନେ ‘ନୋ କିଙ୍ଗସ୍’ ସ୍ଲୋଗାନ ଦେଇ ବିଭିନ୍ନ ସହରରେ ରାଲି ମଧ୍ୟ କରିଥିଲେ। ଏହି ପ୍ରତିବାଦର ପ୍ରଭାବ କେବଳ ଆମେରିକାରେ ନୁହେଁ ବରଂ ସମଗ୍ର କାନାଡା, ୟୁରୋପ ଏବଂ ମଧ୍ୟପ୍ରାଚ୍ୟରେ ମଧ୍ୟ ଦେଖିବାକୁ ମିଳିଥିଲା। ରାଷ୍ଟ୍ରପତି ଟ୍ରମ୍ପଙ୍କ ନେତୃତ୍ୱରେ ଆମେରିକା ଏକଛତ୍ରବାଦ ଶାସନ ଆଡକୁ ଗତି କରୁଥିବା ନେଇ ବିକ୍ଷୋଭକାରୀ ମାନେ ଦାବି କରିଛନ୍ତି। ତେବେ ଏହା ପ୍ରଭାବରେ ନ୍ୟୁୟର୍କର ଟାଇମ୍ସ ସ୍କୋୟାରରେ ବହୁ ସଂଖ୍ୟକ ପ୍ରଦର୍ଶନକାରୀ ମାନେ ଏକତ୍ରିତ ହୋଇଥିଲେ।ଏଥିସହିତ ହଜାର ହଜାର ଲୋକ ବୋଷ୍ଟନ, ଆଟଲାଣ୍ଟା ଏବଂ ଚିକାଗୋରେ ମଧ୍ୟ ରାଲି କରିଥିଲେ।
ତେବେ ଏହି ପ୍ରଦର୍ଶନଗୁଡ଼ିକୁ ‘ହେଟ୍ ଆମେରିକା’ ରାଲି ଭାବରେ ଟ୍ରମ୍ପଙ୍କ ରିପବ୍ଲିକାନ୍ ପାର୍ଟି ନାମିତ କରିଛି। ଟ୍ରମ୍ପ ନିଜ ପଦରେ ଶପଥ ନେବା ପରଠାରୁ ଏହା ତୃତୀୟ ବଡ଼ ଗଣ ବିକ୍ଷୋଭ ଅଟେ। ଆମେରିକାରେ ଫେଡେରାଲ୍ କାର୍ଯ୍ୟକ୍ରମ ଏବଂ ସେବାଗୁଡ଼ିକ ବନ୍ଦ ହୋଇଯିବା ପରେ ଆମେରିକା ବର୍ତ୍ତମାନ ଏକ ବଡ଼ ସମସ୍ୟାର ସମ୍ମୁଖୀନ ହେଉଛି। ଏପରି ସମୟରେ ପ୍ରତିବାଦ ଆମେରିକା ପାଇଁ ଆହୁରି ବିପଦ ବଢ଼ାଇବା ନେଇ ଆଶା କରାଯାଉଛି।
ଏକ ରିପୋର୍ଟ ଅନୁଯାୟୀ ୱାଶିଂଟନ୍, ଡି.ସି. ଏବଂ ନ୍ୟୁୟର୍କ ଭଳି ପ୍ରମୁଖ ସହରରୁ ଆରମ୍ଭ କରି ଛୋଟ ସହର ପର୍ଯ୍ୟନ୍ତ ସମସ୍ତ ୫୦ଟି ରାଜ୍ୟରେ ୨୫୦୦ରୁ ଅଧିକ ପ୍ରଦର୍ଶନ କରାଯାଇଛି।
ରାଷ୍ଟ୍ରପତି ଟ୍ରମ୍ପ ଜଣେ ରାଜା ପରି ଏକଛତ୍ରବାଦ ଶାସନ କରୁଥିବା ଅଭିଯୋଗକୁ ଖଣ୍ଡନ କରି କହିଛନ୍ତି ଯେ “ମୁଁ କୌଣସି ରାଜା ନୁହେଁ କି ରାଜା ପରି ଅନୁଭବ ମଧ୍ୟ କରୁନାହିଁ। କିଛି ଅନୁମୋଦନ ପାଇବା ପାଇଁ ମୋତେ ମଧ୍ୟ ଅନେକ ଅସୁବିଧାର ସମ୍ମୁଖୀନ ହେବାକୁ ପଡିଥାଏ। ଏଥିସହିତ ସେ ରାଷ୍ଟ୍ରପତି ପଦକୁ ଡିପ୍ ଷ୍ଟେଟ୍ ଦ୍ୱାରା ନିୟନ୍ତ୍ରିତ ଏକ କଷ୍ଟକର କାମ ହେବା ସହ ଡେମୋକ୍ରାଟ୍ ଦ୍ୱାରା ପ୍ରାଧାନ୍ୟ ବିସ୍ତାରିତ ଏକ ଅମଲାତନ୍ତ୍ର ବୋଲି କହିଛନ୍ତି। ଏଥିସହିତ ଏହାକୁ ସେ ମୌଳିକ ବାମପନ୍ଥୀ ବିରୋଧୀ ଭାବରେ ବର୍ଣ୍ଣନା କରିଛନ୍ତି ଯାହା ଅଧିକାଂଶ ଗୋରା ଆମେରିକୀୟଙ୍କ ଅସାଧାରଣତାକୁ ଦୁର୍ବଳ କରିଛି ବୋଲି କହିଛନ୍ତି।