ନୂଆଦିଲ୍ଲୀ: ଭାରତୀୟ ବିମାନ ଚଳାଚଳ କ୍ଷେତ୍ରରେ ଆସିବାକୁ ଯାଉଛି ଏକ ବଡ଼ ବିପ୍ଳବ। ଏଣିକି ଟ୍ରେନ୍ ଭଳି ଆକାଶରେ ବି ଲାଗିବ ଭିଡ଼ । ଇଣ୍ଡିଗୋ, ଏୟାର ଇଣ୍ଡିଆ ଏବଂ ଅକାସା ଏୟାର ମଧ୍ୟରେ ଆରମ୍ଭ ହୋଇଛି ଜୋରଦାର ଟକ୍କର। ଆଗାମୀ ଦୁଇ ବର୍ଷ ମଧ୍ୟରେ ଭାରତକୁ ଆସିବାକୁ ଯାଉଛି ୨୪୦ଟି ନୂଆ ବିମାନ। ଅର୍ଥାତ୍ ପ୍ରତି ମାସରେ ଆକାଶରେ ଉଡ଼ିବ ୧୦ଟି ନୂଆ ପ୍ଲେନ୍।
ଭାରତରେ ଏବେ ଯାତ୍ରା କରିବାର ଶୈଳୀ ବଦଳିବାରେ ଲାଗିଛି। ବସ୍ ଏବଂ ଟ୍ରେନ୍ର ଲମ୍ବା ଯାତ୍ରା ଛାଡ଼ି ଏବେ ସମୟ ବଞ୍ଚାଇବା ପାଇଁ ଲୋକେ ବିମାନ ଯାତ୍ରାକୁ ଅଧିକ ପସନ୍ଦ କରୁଛନ୍ତି। ବଢୁଥିବା ଡିମାଣ୍ଡକୁ ଦେଖି ଦେଶର ବଡ଼ ବଡ଼ ଏୟାରଲାଇନ୍ସ ଏବେ ମାଷ୍ଟର ପ୍ଲାନ୍ ପ୍ରସ୍ତୁତ କରିଛନ୍ତି।
ଏହି ବଡ଼ ଡିଲ୍ ପରେ ସାଧାରଣ ଯାତ୍ରୀଙ୍କ ପାଇଁ ଖୁସି ଖବର ଆସିଛି।
ଏଣିକି କମିବ ବିମାନ ଭଡ଼ା: ଯେତେବେଳେ କମ୍ପାନୀଙ୍କ ମଧ୍ୟରେ ପ୍ରତିଯୋଗିତା ବଢ଼ିବ, ଯାତ୍ରୀଙ୍କୁ ଆକୃଷ୍ଟ କରିବା ପାଇଁ ଏୟାରଲାଇନ୍ସ ଭଡ଼ା କମାଇ ପାରନ୍ତି।
ନୂଆ ରୁଟ୍: ଅନେକ ଛୋଟ ସହର ଏବେ ବିମାନ ସେବା ସହ ଯୋଡ଼ି ହେବ।
ଅଧିକ ବିକଳ୍ପ: ଏଣିକି ଯାତ୍ରୀଙ୍କ ପାଖରେ ମନପସନ୍ଦର ସମୟ ଏବଂ ବଜେଟ୍ ଅନୁସାରେ ଅନେକ ବିମାନର ଅପ୍ସନ ରହିବ।
କେବଳ ବିମାନ ଯାତ୍ରା ସହଜ ହେବନି, ଏହା ରୋଜଗାରର ନୂଆ ଦ୍ୱାର ମଧ୍ୟ ଖୋଲିବ। ବିଶ୍ୱର ପ୍ରସିଦ୍ଧ ବିମାନ ନିର୍ମାତା କମ୍ପାନୀ ‘ବୋଇଂ’ ର ସୂଚନା ଅନୁସାରେ:
ଆଗାମୀ କିଛି ବର୍ଷରେ ପ୍ରାୟ ୪୫ ହଜାର ନୂଆ ପାଇଲଟ୍ ଆବଶ୍ୟକ ପଡ଼ିବ। ଏହା ସହିତ କ୍ୟାବିନ କ୍ରୁ, ଟେକ୍ନିକାଲ ଷ୍ଟାଫ୍ ଏବଂ ଗ୍ରାଉଣ୍ଡ ଷ୍ଟାଫ୍ ଭାବେ ଲକ୍ଷ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ।
ତେବେ ଆପଣ ବି ପ୍ରସ୍ତୁତ ହୋଇଯାଆନ୍ତୁ, କାରଣ ଖୁବଶୀଘ୍ର ଆପଣଙ୍କ ବିମାନ ଯାତ୍ରା ଆହୁରି ଶସ୍ତା ଏବଂ ସହଜ ହେବାକୁ ଯାଉଛି ।