ଭୁବନେଶ୍ୱର: ରାଜ୍ୟରେ ବଢିଚାଲିଛି ବାଲି ଚୋରା ଚାଲାଣ। ଏଥିରେ ଲାଗିପାରୁନି ଅଙ୍କୁଶ। ବେଆଇନ ବାଲିଘାଟକୁ ନେଇ ଅପରାଧୀମାନେ ରକ୍ତମୁଖା ହେଉଛନ୍ତି। ଏହାକୁ ଦୃଷ୍ଟିରେ ରଖି ବିଭିନ୍ନ ଜିଲ୍ଲାରେ ବାଲିଘାଟ ଜଗିବା ଦାୟିତ୍ବ ଓଡ଼ିଶା ଶିଳ୍ପ ସୁରକ୍ଷା ବଳ (ଓଆଇଏସଏଫ୍)କୁ ପ୍ରଦାନ କରାଯିବ। ଏଥିପାଇଁ ଖଣି ବିଭାଗ ପକ୍ଷରୁ ଗୃହ ବିଭାଗକୁ ଅନୁରୋଧ କରାଯାଇଛି। ଗୁରୁବାର ବିଧାନସଭାରେ ଏକ ଲିଖିତ ଉତ୍ତରରେ ଖଣି ମନ୍ତ୍ରୀ ବିଭୂତି ଭୂଷଣ ଜେନା ଏପରି ସୂଚନା ଦେଇଛନ୍ତି।
ମନ୍ତ୍ରୀ ଦର୍ଶାଇଛନ୍ତି ଯେ, ଜିଲ୍ଲାସ୍ତରରେ ଖଣି ଅଧିକାରୀଙ୍କୁ ସ୍ବତନ୍ତ୍ର ଭାବେ ସୁରକ୍ଷା ବଳ ଯୋଗାଇ ଦେବା ପାଇଁ ବିଭାଗ ଯୋଜନା କରିଛି। ଏଥିପାଇଁ ୫୭ ସେକ୍ସନ ଓଆଇଏସ୍ଏଫ୍ ନିୟୋଜନ କରିବା ପାଇଁ ଗୃହ ବିଭାଗକୁ ଅନୁରୋଧ କରାଯାଇଛି। ସେହିପରି ଓଏମ୍ଏମ୍ସି-୨୦୧୬ ନିୟମକୁ ସଂଶୋଧନ କରି ଖଣି ବିଭାଗର ଅଧିକାରୀଙ୍କ ବ୍ୟତୀତ ଅତିରିକ୍ତ ତହସିଲଦାର, ପୋଲିସ ସବ୍ଇନ୍ସପେକ୍ଟର ଓ ତାଙ୍କ ଉପରିସ୍ଥ ଅଧିକାରୀଙ୍କୁ ଚଢ଼ଉ ଓ ବେଆଇନ ଖଣିଜ ଜବତ କରିବା ପାଇଁ କ୍ଷମତା ଦେବାକୁ ପଦକ୍ଷେପ ନିଆଯାଇଛି।
ସେହିପରି ଓଡ଼ିଶାରୁ କିଛି ପଡ଼ୋଶୀ ରାଜ୍ୟ ଓ ବିଦେଶକୁ ବି ବାଲି ରପ୍ତାନି ହେଉଛି। ୨୦୨୩-୨୪ ଓ ୨୦୨୪-୨୫ରେ କଟକ, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ଢେଙ୍କାନାଳରୁ ଆଣ୍ଡାମାନ ନିକୋବର ଦ୍ବୀପପୁଞ୍ଜକୁ ବାଲି ରପ୍ତାନି କରାଯାଇଛି। ଗଜପତି, ରାୟଗଡ଼ାରୁ ଆନ୍ଧ୍ରପ୍ରଦେଶକୁ ବାଲି ରପ୍ତାନି କରାଯାଇଥିବା ବେଳେ ଯାଜପୁରରୁ ପଶ୍ଚିମବଙ୍ଗ ଓ ଝାଡ଼ଖଣ୍ଡକୁ ବାଲି ରପ୍ତାନି ହୋଇଛି। ଏ ବାବଦରେ ରାଜ୍ୟ ସରକାର ରାଜସ୍ବ ପାଇଛନ୍ତି। ରାଜ୍ୟର ବିଭିନ୍ନ ଜିଲାରେ ଏବେ ୯୯୪ଟି ବାଲିଘାଟ ନିଲାମ ହୋଇଥିବା ବେଳେ ଶତାଧିକ ବାଲିଘାଟ ନିଲାମ ହୋଇପାରି ନାହିଁ।
ଗତ ୧୯ ତାରିଖରେ ମନ୍ତ୍ରୀ ଜେନା ଦେଇଥିବା ଉତ୍ତର ଅନୁସାରେ ୨୦୨୪-୨୫ରେ ସରକାର ନିଲାମ ହୋଇଥିବା ବାଲିଘାଟରୁ ୧୧୨.୧୪ କୋଟି ଟଙ୍କାର ରାଜସ୍ବ ପାଇଥିବା ବେଳେ ଚୋରା କାରବାର କରୁଥିବା ଲୋକଙ୍କଠାରୁ ୬୪.୦୪ କୋଟି ଟଙ୍କାର ଜୋରିମାନା ଆଦାୟ କରାଯାଇଛି। ଏନେଇ ୧୧,୨୨୩ ଥର ଚଢ଼ଉ କରାଯାଇ ୧୦,୪୦୫ ଗାଡ଼ି ଜବତ କରାଯାଇଛି ଏବଂ ୧୧୦୧ ଜଣଙ୍କୁ ଗିରଫ କରାଯାଇଛି।