- ଆଧୁନିକ ସହରାଞ୍ଚଳ ଯୋଜନାର ଆବଶ୍ୟକତା ସହିତ ତାଳ ଦେଇ ଓଡ଼ିଶାରେ ଜମି କିସମ ପରିବର୍ତ୍ତନ ନିୟମକୁ ବଦଳେଇବାକୁ ଦାବି କରିଛନ୍ତି ରାଜ୍ୟର ଡେଭଲପର୍ସ
- ମହାରାଷ୍ଟ୍ର ଏବଂ କର୍ଣ୍ଣାଟକ ସରକାର ଜମି କିସମ ପରିବର୍ତ୍ତନ ପ୍ରକ୍ରିୟାରେ ସକାରାତ୍ମକ ପଦକ୍ଷେପ ନେଇଛନ୍ତି, ଯାହାଫଳରେ ପ୍ରକଳ୍ପ ଯୋଜନା ଅନୁମୋଦନ ସମୟରେ ଏହି ଜମି କିସମ ପରିବର୍ତ୍ତନ ସ୍ୱୟଂଚାଳିତ ଭାବେ ହୋଇପାରୁଛି
ଭୁବନେଶ୍ୱର: ନିକଟରେ ଏକ ଗୁରୁତ୍ୱପୂର୍ଣ୍ଣ ନିଷ୍ପତି କ୍ରମେ ମହାରାଷ୍ଟ୍ର ଏବଂ କର୍ଣ୍ଣାଟକ ସରକାର ଆଧୁନିକ ସହରାଞ୍ଚଳ ଯୋଜନାର ଆବଶ୍ୟକତାକୁ ଦୃଷ୍ଟିରେ ରଖି ନିଜର ଜମି କିସମ ପରିବର୍ତ୍ତନ ପ୍ରକ୍ରିୟାରେ ବ୍ୟାପକ ସଂସ୍କାର ଆଣିଛନ୍ତି। କର୍ଣ୍ଣାଟକରେ, ସିଡିପି ଅଧୀନରେ ଥିବା ‘ଗ୍ରେଟର ବେଙ୍ଗାଲୁରୁ ଅଞ୍ଚଳ’ (ଜିବିଏ) ପାଇଁ ପୃଥକ ଜମି କିସମ ପରିବର୍ତ୍ତନର ଆବଶ୍ୟକତାକୁ ଉଚ୍ଛେଦ କରାଯାଇଛି, ଫଳରେ ପ୍ରକଳ୍ପ ଅନୁମୋଦନ ସମୟରେ ହିଁ ଏହି ଜମି କିସମ ପରିବର୍ତ୍ତନ ପ୍ରକ୍ରିୟା ସ୍ୱୟଂଚାଳିତ ଭାବେ ସମ୍ପାଦିତ ହେଇପାରୁଛି। ସେହିପରି ମହାରାଷ୍ଟ୍ରରେ ମଧ୍ୟ ପୃଥକ ଏନ.ଏ ଅନୁମତିର ବାଧ୍ୟତାମୂଳକ ନିୟମକୁ ଉଚ୍ଛେଦ କରାଯାଇଛି। ବର୍ତ୍ତମାନ ନଗର ଉନ୍ନୟନ ବିଭାଗ କିମ୍ବା ସ୍ଥାନୀୟ ଯୋଜନା କର୍ତ୍ତୃପକ୍ଷଙ୍କ ଦ୍ୱାରା ‘ବିଲ୍ଡିଂ ପ୍ଲାନ୍’ ଅନୁମୋଦନ ଯଥେଷ୍ଟ ବୋଲି ବିବେଚନା କରାଯାଉଛି।
ମହାରାଷ୍ଟ୍ର ଏବଂ କର୍ଣ୍ଣାଟକ ସରକାରଙ୍କ ପଦକ୍ଷେପ ଉପରେ ମନ୍ତବ୍ୟ ଦେଇ ଓଡ଼ିଶା ଡେଭଲପର୍ସ ଫେଡେରେସନ (ଓଡିଫେଡ଼୍) ର ପ୍ରେସିଡେଣ୍ଟ ପ୍ରଦୀପ୍ତ କୁମାର ବିଶ୍ୱାସରୋୟ କହିଛନ୍ତି, “ଏହି ସଂସ୍କାରଗୁଡ଼ିକ ପ୍ରମାଣିତ କରୁଛି ଯେ ଜମି କିସମ ପରିବର୍ତ୍ତନ ପ୍ରକ୍ରିୟା ହେଉଛି ଯୋଜନାବଦ୍ଧ ସହରାଞ୍ଚଳ ବିକାଶର ଏକ ଅବିଚ୍ଛେଦ୍ୟ ଅଙ୍ଗ। ଏହାର ଲକ୍ଷ୍ୟ ହେଉଛି ପ୍ରଶାସନିକ ପ୍ରକ୍ରିୟାକୁ ଶୃଙ୍ଖଳିତ କରିବା, ଅମଲାତାନ୍ତ୍ରିକ ବିଳମ୍ବ ହ୍ରାସ କରିବା ଏବଂ ଦ୍ରୁତ ଅଭିବୃଦ୍ଧିକୁ ପ୍ରୋତ୍ସାହିତ କରିବା। ସେ ଆହୁରି ମଧ୍ୟ କହିଛନ୍ତି, ଓଡ଼ିଶାରେ ବିଲଡର୍ ଏବଂ ଡେଭଲପର୍ମାନେ ଏକ ଜଟିଳ ଅନୁମତି-ଭିତ୍ତିକ ବ୍ୟବସ୍ଥା ମଧ୍ୟରେ କାର୍ଯ୍ୟ କରୁଛନ୍ତି ଯାହା ଅନ୍ୟ ରାଜ୍ୟରେ ପ୍ରଚଳିତ ଦ୍ରୁତ ବିଜ୍ଞପ୍ତି-ଆଧାରିତ ମଡେଲ୍ର ସମ୍ପୂର୍ଣ୍ଣ ବିପରୀତ।
ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ ବିଡିଏ ଭଳି ସଂସ୍ଥାଠାରୁ ପୃଥକ ବିଲ୍ଡିଂ ପ୍ଲାନ୍ ଅନୁମୋଦନ ପାଇବା ପରେ ମଧ୍ୟ ରାଜସ୍ୱ ବିଭାଗରୁ ପୁଣିଥରେ ଅଣ-କୃଷି କିସମ ପରିବର୍ତ୍ତନ ଆଦେଶ ପାଇବାକୁ ପଡ଼ିଥାଏ। ଏହା ବ୍ୟତୀତ ପ୍ରକଳ୍ପଟି ପ୍ରାକୃତିକ ଜଳାଶୟ କିମ୍ବା ନିକଟସ୍ଥ ଚାଷ ଜମିକୁ ପ୍ରଭାବିତ କରୁଛି କି ନାହିଁ ତାହା ଯାଞ୍ଚ କରିବା ପାଇଁ କ୍ଷେତ୍ର ପରିଦର୍ଶନ ମଧ୍ୟ କରାଯାଏ। ବିଶେଷ କରି ଖୋର୍ଦ୍ଧା ଏବଂ ପୁରୀ ଭଳି ଜିଲ୍ଲାଗୁଡ଼ିକରେ ପ୍ରକଳ୍ପ ସମାପ୍ତ କରିବା କ୍ଷେତ୍ରରେ ଅନେକ ଅତିରିକ୍ତ ଆହ୍ୱାନର ସମ୍ମୁଖୀନ ହେବାକୁ ପଡ଼ୁଛି।”
ଯେହେତୁ ଭାରତରେ ସହରଗୁଡିକ ସମ୍ପ୍ରସାରିତ ହେଉଛି ଏବଂ ସହରାଞ୍ଚଳ ଦ୍ରୁତ ଗତିରେ ବିକଶିତ ହେଉଛି, ନିୟାମକ ଢାଞ୍ଚା କିପରି ବିକାଶମୂଳକ ଆବଶ୍ୟକତା ସହିତ ତାଳ ଦେଇ ଗତି କରିପାରିବ ତାହା ସୁନିଶ୍ଚିତ କରିବା ଆବଶ୍ୟକ। ସହରୀ ଅଭିବୃଦ୍ଧିର ଏକ ଗୁରୁତ୍ୱପୂର୍ଣ୍ଣ ଦିଗ ହେଉଛି ଜମି କିସମ ପରିବର୍ତ୍ତନ ପ୍ରକ୍ରିୟା ଯାହା କୃଷି ଜମିକୁ ଗୃହ, ବାଣିଜ୍ୟ ଏବଂ ଭିତ୍ତିଭୂମି ପାଇଁ ସ୍ଥାନରେ ପରିଣତ କରେ । ଜମି କିସମ ପରିବର୍ତ୍ତନ ମୁଖ୍ୟତଃ ରାଜ୍ୟ ଆଇନ ଦ୍ୱାରା ନିୟନ୍ତ୍ରିତ ହୋଇଥାଏ, କାରଣ ଭାରତୀୟ ସମ୍ବିଧାନ ଅଧୀନରେ ଜମି ଏକ ରାଜ୍ୟ ବିଷୟ ଅଟେ। ତଦନୁଯାୟୀ, କୃଷି ଜମି ନିର୍ମାଣ କିମ୍ବା ବାଣିଜ୍ୟିକ ବ୍ୟବହାର ପାଇଁ ଅଣ-କୃଷି (ଏନଏ) ଅନୁମତି ଆବଶ୍ୟକ, ଯାହା ପ୍ରଯୁଜ୍ୟ ମାଷ୍ଟର ପ୍ଲାନ କିମ୍ବା ବିସ୍ତୃତ ବିକାଶ ଯୋଜନା ଅନୁଯାୟୀ ଜିଲ୍ଲା କର୍ତ୍ତୃପକ୍ଷଙ୍କ ଦ୍ୱାରା ପ୍ରଦାନ କରାଯାଏ।
“ଏହି ଦୁଇଟି ପ୍ରମୁଖ ରାଜ୍ୟରୁ ସୂଚନା ନେଇ ଓଡ଼ିଶାର ଅନେକ ଡେଭଲପର୍ ଦକ୍ଷତାରେ ଉନ୍ନତି ଆଣିବା, ବିଳମ୍ବ ହ୍ରାସ କରିବା ଏବଂ ଦ୍ରୁତ ସହରାଞ୍ଚଳ ଅଭିବୃଦ୍ଧିକୁ ସୁଗମ କରିବା ପାଇଁ ବିଲ୍ଡିଂ ପ୍ଲାନ୍ ଅନୁମୋଦନ ପ୍ରଣାଳୀ ସହିତ ଜମି କିସମ ପରିବର୍ତ୍ତନ ପ୍ରକ୍ରିୟାକୁ ଏକୀକୃତ କରିବାକୁ ଆହ୍ବାନ କରିଛନ୍ତି। ସେମାନେ ମତ ଦିଅନ୍ତି ଯେ ଥରେ ଏକ ନିର୍ଦ୍ଦିଷ୍ଟ ବିକାଶ କର୍ତ୍ତୃପକ୍ଷ ମାଷ୍ଟରପ୍ଲାନ୍ ଅଧୀନରେ ଜମି ବ୍ୟବହାର ସ୍ଥିର କରିସାରିଲେ, ତହସିଲଦାର ଏବଂ ଜିଲ୍ଲା କର୍ତ୍ତୃପକ୍ଷଙ୍କ ଠାରୁ ଅତିରିକ୍ତ ମଞ୍ଜୁରୀ ଆବଶ୍ୟକ କେବଳ ଅନାବଶ୍ୟକ ସ୍ତର ସୃଷ୍ଟି କରେ ଏବଂ ବିକାଶକୁ ଆହୁରି ମନ୍ଥର କରିଦିଏ । ପୃଥକ ଜମି କିସମ ପରିବର୍ତ୍ତନ ଆଇନ ଏବଂ ଏକାଧିକ ଅନୁମୋଦନ ଅନାବଶ୍ୟକ, କାରଣ ଏହା କେବଳ ପ୍ରକଳ୍ପକୁ ବିଳମ୍ବ କରେ ଏବଂ ପ୍ରକ୍ରିୟାକୁ ଲମ୍ବା ଏବଂ କଷ୍ଟଦାୟକ କରିଥାଏ” ବୋଲି କହିଛନ୍ତି ଓଡିଫେଡ଼୍ର ସାଧାରଣ ସମ୍ପାଦକ ଉମେଶ ପଟ୍ଟନାୟକ।
ତେଣୁ, ସମାନ ଢାଞ୍ଚାଗତ ପରିବର୍ତ୍ତନ ଗ୍ରହଣ କରିବା ଦ୍ୱାରା ଓଡ଼ିଶାର ରିଅଲ୍ ଇଷ୍ଟେଟ୍ ଦୃଶ୍ୟପଟ୍ଟରେ ପରିବର୍ତ୍ତନ ଆସିପାରେ । ଏହିପରି ସଂସ୍କାର କେବଳ ବିକାଶକୁ ତ୍ୱରାନ୍ୱିତ କରିବ ନାହିଁ ବରଂ ରାଜ୍ୟରେ ଏକ ଅଧିକ ସ୍ୱଚ୍ଛ, ନିବେଶକ-ଅନୁକୂଳ ଏବଂ ଅଭିବୃଦ୍ଧି ଭିତ୍ତିକ ନିୟାମକ ପରିବେଶକୁ ମଧ୍ୟ ପ୍ରୋତ୍ସାହିତ କରିବ।