ୱାକଫ ଆଇନକୁ ନେଇ ରାଜ୍ୟର ମୁସଲିମ ସମ୍ପ୍ରଦାୟକୁ ଆଶ୍ୱାସନା ଦେଇ ଏପରି କହିଲେ ମମତା

କୋଲକତା: ପଶ୍ଚିମବଙ୍ଗରେ ୱାକଫ ଆଇନକୁ ନେଇ ହିଂସାତ୍ମକ ପ୍ରତିବାଦ ମଧ୍ୟରେ ବଡ ବୟାନ ଦେଇଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ସେ କହିଛନ୍ତି ଯେ, ତାଙ୍କ ସରକାର ରାଜ୍ୟର ମୁସଲିମ ସମ୍ପ୍ରଦାୟଙ୍କ ସମ୍ପତ୍ତିର ସୁରକ୍ଷା ସୁନିଶ୍ଚିତ କରିବ । ଜୈନ ସମ୍ପ୍ରଦାୟ ଦ୍ୱାରା ଆୟୋଜିତ ବିଶ୍ୱ ନବକାର ମହାମନ୍ତ୍ର ଦିବସରେ ଭାଷଣ ଦେଇ ମମତା ବିଜେପିକୁ କଟାକ୍ଷ କରିଥିଲେ ଏବଂ ଏକତାର ସମର୍ଥନ କରିଥିଲେ, ସେ ଦୃଢ଼ତାର ସହିତ କହିଥିଲେ ଯେ ସେ ବଙ୍ଗଳାରେ ୱାକଫ ବିଲ୍ ଲାଗୁ ହେବାକୁ ଦେବେ ନାହିଁ ଏବଂ ଧର୍ମୀୟ ଆଧାରରେ ବଙ୍ଗଳାକୁ ବିଭାଜିତ ହେବାକୁ ଦେବେ ନାହିଁ ।

ତୃଣମୂଳ ମୁଖ୍ୟ କହିଛନ୍ତି, “କିଛି ଲୋକ ପଚାରନ୍ତି ଯେ ମୁଁ କାହିଁକି ସମସ୍ତ ଧର୍ମ ସ୍ଥାନକୁ ଯାଏ । ମୁଁ କହିଥିଲି ଯେ ମୁଁ ମୋ ଜୀବନ ଥିବା ପର୍ଯ୍ୟନ୍ତ ସେଠାକୁ ଯିବି । ତୁମେ ମୋତେ ଗୁଳି କଲେ ମଧ୍ୟ ତୁମେ ମୋତେ ଏକତାରୁ ଅଲଗା କରିପାରିବ ନାହିଁ । ବଙ୍ଗଳାରେ କୌଣସି ବିଭାଜନ ହେବ ନାହିଁ, ବଞ୍ଚ ଏବଂ ବଞ୍ଚିବାକୁ ଦିଅ।”

ମମତା କହିଥିଲେ, “ଯଦି କାହାକୁ ମୋର ସମ୍ପତ୍ତି ନେବାକୁ ଅଧିକାର ନାହିଁ, ତେବେ ମୁଁ କିପରି କହିପାରିବି ଯେ ଅନ୍ୟ କାହାର ସମ୍ପତ୍ତି ନେଇହେବ? ଆମକୁ 30 ପ୍ରତିଶତ (ମୁସଲମାନ) ସାଙ୍ଗରେ ନେଇ ଚାଲିବାକୁ ହେବ । ମନେରଖ, ଦିଦି ତୁମର ସମ୍ପତ୍ତିକୁ ସୁରକ୍ଷା ଦେବେ।”

ସୂଚନାଯୋଗ୍ୟ ଯେ, ମଙ୍ଗଳବାର ବଙ୍ଗଳାର ମୁର୍ଶିଦାବାଦରେ ୱାକଫ ଆଇନ ବିରୋଧରେ ପ୍ରତିବାଦ ସମୟରେ, ପ୍ରଦର୍ଶନକାରୀଙ୍କ ଏକ ଗୋଷ୍ଠୀ ପୋଲିସ ସହିତ ସଂଘର୍ଷ କରିଥିଲେ, ଯେଉଁଥିରେ ପୋଲିସ ଗାଡ଼ିଗୁଡ଼ିକୁ ନିଆଁ ଲଗାଇ ଦିଆଯାଇଥିଲା ଏବଂ ପଥର ମାଡ଼ କରାଯାଇଥିଲା ।