କଟକରେ ୨ପ୍ରମୁଖ ଭିତ୍ତିଭୂମି ପ୍ରକଳ୍ପକୁ ସଫଳତା ସହ କାର୍ଯ୍ୟକ୍ଷମ କଲା ଟିପିସିଓଡିଏଲ୍
କଟକ: ଐତିହାସିକ କଟକର ବାସିନ୍ଦାଙ୍କୁ ନିର୍ଭରଯୋଗ୍ୟ ବିଦ୍ୟୁତ୍ ଯୋଗାଣ ସୁନିଶ୍ଚିତ କରିବା ଦିଗରେ ଟିପି ସେଣ୍ଟ୍ରାଲ୍ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍ (ଟିପିସିଓଡିଏଲ୍) ଏହି ଅଞ୍ଚଳରେ ଦୁଇଟି ପ୍ରମୁଖ ଭିତ୍ତିଭୂମି ପ୍ରକଳ୍ପକୁ ସଫଳତାର ସହିତ କାର୍ଯ୍ୟକ୍ଷମ କରିଛି।
ମଙ୍ଗୁଳିରେ ଏକ ନୂତନ ପ୍ରାଇମେରୀ ସବଷ୍ଟେସନ୍ ପ୍ରତିଷ୍ଠା କରାଯାଇଛି, ଯାହା ଦ୍ଵାରା ମଙ୍ଗୁଳି, ଚୌଦ୍ୱାର ଏବଂ ଟାଙ୍ଗୀ ଅଞ୍ଚଳର ୧୦,୦୦୦ ରୁ ଅଧିକ ଗ୍ରାହକ ଉପକୃତ ହେବେ । ଏହି ନୂତନ ପଦକ୍ଷେପ ବିଦ୍ୟୁତ୍ ଯୋଗାଣର ଗୁଣବତ୍ତା ଏବଂ ନିର୍ଭରଯୋଗ୍ୟତା ବୃଦ୍ଧି କରିବ, ଯାହା ଅଞ୍ଚଳର ଘରୋଇ ଉପ୍ଲଭୋକ୍ତାଙ୍କୁ ନିର୍ଭରଯୋଗ୍ୟ ବିଦ୍ୟୁତ୍ ସେବା ଯୋଗାଇବା ସହ ଶିଳ୍ପକ୍ଷେତ୍ରର ବିକାଶରେ ସହାୟକ ହେବ ।
ଆଉ ଏକ ପ୍ରମୁଖ ବିକାଶରେ, କଳିଙ୍ଗ ପ୍ରାଇମେରୀ ସବଷ୍ଟେସନରେ ଏକ ୨୦/୨୫ ଏମଭିଏ ପାୱାର ଟ୍ରାନ୍ସଫର୍ମରକୁ ସଫଳତାର ସହିତ ଚାର୍ଜ କରାଯାଇଛି। ଏହି ଭିତ୍ତିଭୂମି ବିକାଶ ହେବା ଦ୍ବାରା ବାରବାଟୀ ଷ୍ଟାଡିୟମ୍ ଅଞ୍ଚଳ, ଚଣ୍ଡୀ ମନ୍ଦିର, ତୁଳସୀପୁର, ଚାନ୍ଦନୀ ଚୌକ, ବକ୍ସି ବଜାର ଏବଂ ସତୀ ଚୌରା ଭଳି ପ୍ରମୁଖ ଅଞ୍ଚଳଗୁଡ଼ିକରେ ନିରନ୍ତର ବିଦ୍ୟୁତ୍ ଯୋଗାଣକୁ ସୁଦୃଢ଼ କରିବ। ଏହା ଦ୍ବାରା ୧୦,୦୦୦ ରୁ ଅଧିକ ଉପଭୋକ୍ତା ଉପକୃତ ହେବେ।
ଏହି ପଦକ୍ଷେପଗୁଡ଼ିକ ଟିପିସିଓଡିଏଲର ଗ୍ରୀଷ୍ମ ପ୍ରସ୍ତୁତିର ଏକ ଅଂଶ ଅଟେ, ଯାହାର ଲକ୍ଷ୍ୟ ହେଉଛି ଗ୍ରୀଷ୍ମ ଋତୁରେ ବର୍ଦ୍ଧିତ ବିଦ୍ୟୁତ ଚାହିଦାକୁ ପୂରଣ କରିବା ଏବଂ ଉନ୍ନତ ଭିତ୍ତିଭୂମି ବିକାଶ ମାଧ୍ୟମରେ ଲୋକଙ୍କୁ ଉନ୍ନତ ସେବା ଯୋଗାଇବା।
ଟିପିସିଓଡିଏଲ୍ ଉପଭୋକ୍ତାଙ୍କୁ ସ୍ଥିର, ଦକ୍ଷ ଏବଂ ଉନ୍ନତ ବିଦ୍ୟୁତ ଯୋଗାଣ ସୁନିଶ୍ଚିତ କରି କେନ୍ଦ୍ରୀୟ ଓଡ଼ିଶାରେ ବିଦ୍ୟୁତ ଭିତ୍ତିଭୂମିର ବିକାଶ ପାଇଁ ସଂକଳ୍ପବଦ୍ଧ।
