ସୁସ୍ଥ ହେଉଛନ୍ତି ଶ୍ରେୟସ ଆୟର, ଆଇସିୟୁରୁ ବାହାରିଲେ

ନୂଆଦିଲ୍ଲୀ: ଭାରତୀୟ ଦିନିକିଆ ଦଳର ଉପ-ଅଧିନାୟକ ଶ୍ରେୟସ ଆୟର ଆଇସିୟୁରୁ ବାହାରିଛନ୍ତି। ଅଷ୍ଟ୍ରେଲିଆ ବିପକ୍ଷ ତୃତୀୟ ଦିନିକିଆରେ ଫିଲ୍ଡିଂ କରିବା ସମୟରେ ଆହତ ହେବା ପରେ ତାଙ୍କୁ ସିଡନୀର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା।

ସୋମବାର ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ) ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଏକ ଅପଡେଟ୍ ଦେଇ କହିଛି ଯେ ଟିମର ଡାକ୍ତର ତାଙ୍କ ସହିତ ଉପସ୍ଥିତ ରହିବେ।

ଗଣମାଧ୍ୟମ ରିପୋର୍ଟ ଅନୁସାରେ, ଶ୍ରେୟସ ଆୟରଙ୍କୁ ଆଇସିୟୁରୁ ମୁକ୍ତ କରାଯାଇଛି। ତାଙ୍କ ଅବସ୍ଥା ଏବେ ସ୍ଥିର ରହିଛି। ସୋମବାର ବିସିସିଆଇ ମଧ୍ୟ କହିଛି ଯେ ଶ୍ରେୟସ ଆୟରଙ୍କ ବାମ ପଞ୍ଜରାର ତଳ ଭାଗରେ ଆଘାତ ଲାଗିଥିଲା। ତାଙ୍କୁ ଅଧିକ ଚେକଅପ୍ ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ତାଙ୍କ ଅବସ୍ଥା ସ୍ଥିର ଅଛି ଏବଂ ସେ ସୁସ୍ଥ ହେଉଛନ୍ତି। ବିସିସିଆଇ ଡାକ୍ତରୀ ଦଳ ସିଡନୀ ଏବଂ ଭାରତର ବିଶେଷଜ୍ଞଙ୍କ ସହ ପରାମର୍ଶ କରି ତାଙ୍କ ଆଘାତ ଉପରେ କଡ଼ା ନଜର ରଖିଛି।

ଗଣମାଧ୍ୟମ ରିପୋର୍ଟ ଅନୁସାରେ ଶ୍ରେୟସଙ୍କ ପିତାମାତା ତାଙ୍କୁ ଦେଖିବା ପାଇଁ ଖୁବ୍ ଶୀଘ୍ର ଅଷ୍ଟ୍ରେଲିଆ ଯାତ୍ରା କରିପାରନ୍ତି। ସେମାନେ ତୁରନ୍ତ ଭିସା ପାଇଁ ଆବେଦନ କରିଥିବା ଜଣାପଡ଼ିଛି। ୩୧ ବର୍ଷୀୟ ଆୟରଙ୍କୁ ଭାରତ ଫେରିବା ପାଇଁ ଏବଂ ସୁସ୍ଥ ଘୋଷିତ ହେବା ପୂର୍ବରୁ ଅତି କମରେ ଗୋଟିଏ ସପ୍ତାହ ପାଇଁ ସିଡନୀ ହସ୍ପିଟାଲରେ ରହିବାକୁ ପଡିବ।