ଲଦାଖରେ ବିଶାଳ ପ୍ରତିବାଦ ;ରାଜ୍ୟ ମାନ୍ୟତା ଦାବି କରି ରାସ୍ତାକୁ ଓହ୍ଲାଇଲେ…
ନୂଆଦିଲ୍ଲୀ: ସୋମବାର ଦିନ କଡ଼ା ସୁରକ୍ଷା ମଧ୍ୟରେ ଲଦାଖର ଲେହ ସହରରେ ଶହ ଶହ ଲୋକ ଏକ ରାଲି ବାହାର କରିଥିଲେ ଓ କାରଗିଲରେ ବନ୍ଦ ପାଳନ କରାଯାଇଥିଲା। ଲେହ ଆପେକ୍ସ ବଡି (LAB) ଏବଂ କାରଗିଲ ଡେମୋକ୍ରାଟିକ୍ ଆଲାଏନ୍ସ (KDA) ଦ୍ୱାରା ଏହି ବନ୍ଦ ପାଳନ ଏବଂ ରାଲି ଡାକରା ଦିଆଯାଇଥିଲା। ସେମାନଙ୍କର ମୁଖ୍ୟ ଦାବି ହେଉଛି ଲଦାଖକୁ ରାଜ୍ୟ ମାନ୍ୟତା ଏବଂ ସମ୍ବିଧାନର ଷଷ୍ଠ ଅନୁସୂଚୀରେ ଅନ୍ତର୍ଭୁକ୍ତ କରିବା।
ୱାଙ୍ଗଚୁକ୍ଙ୍କୁ ଜାତୀୟ ସୁରକ୍ଷା ଆଇନ (NSA) ଅଧୀନରେ ପ୍ରାୟ ଛଅ ମାସ ଧରି ଅଟକ ରଖାଯାଇଥିଲା। କେନ୍ଦ୍ର ସରକାର ଶନିବାର ଘୋଷଣା କରିଛନ୍ତି ଯେ ସମସ୍ତ ପକ୍ଷଙ୍କ ସହିତ ଗଠନମୂଳକ ଏବଂ ଅର୍ଥପୂର୍ଣ୍ଣ ଆଲୋଚନାକୁ ସହଜ କରିବା ପାଇଁ ୱାଙ୍ଗଚୁକ୍ଙ୍କ ଅଟକକୁ ପ୍ରତ୍ୟାହାର କରାଯାଉଛି। ପରିବେଶ କର୍ମୀ ସୋନମ ୱାଙ୍ଗଚୁକଙ୍କ ମୁକ୍ତିର ଦୁଇ ଦିନ ପରେ ଏହି ରାଲି ହୋଇଥିଲା। ସେପ୍ଟେମ୍ବର୨୦୨୫ରେ ଲେହରେ ହିଂସାତ୍ମକ ପ୍ରତିବାଦ ଦେଖା ଦେଇଥିଲା, ଯାହା ଫଳରେ ପୋଲିସ ଗୁଳିରେ ଚାରି ଜଣଙ୍କର ମୃତ୍ୟୁ ହୋଇଥିଲା। ଏହା ପରେ ଏହା ପ୍ରଥମ ରାଲି।
ଏହି ରାଲିର ନେତୃତ୍ୱ LABର ସହ-ଅଧ୍ୟକ୍ଷ ଚେରିଙ୍ଗ୍ ଦୋରଜେ ନେଇଥିଲେ। ପ୍ରତିବାଦକାରୀମାନେ ସିଙ୍ଗେ ନାମଗ୍ୟାଲ୍ ଚୌକ୍ ରୁ ଲେହର ପୋଲୋ ଗ୍ରାଉଣ୍ଡ ପର୍ଯ୍ୟନ୍ତ ଶୋଭାଯାତ୍ରା କରିଥିଲେ। ବହୁ ସଂଖ୍ୟକ ମହିଳା ମଧ୍ୟ ଏହି ରାଲିରେ ଅଂଶଗ୍ରହଣ କରିଥିଲେ, ରାଜ୍ୟ ମାନ୍ୟତା ଏବଂ ଷଷ୍ଠ ଅନୁସୂଚୀ ଦାବିକୁ ସମର୍ଥନ କରି ସ୍ଲୋଗାନ ଦେଇଥିଲେ।
ଗତ ପାଞ୍ଚ ବର୍ଷ ଧରି ରାଜ୍ୟ ମାନ୍ୟତା ଏବଂ ଷଷ୍ଠ ଅନୁସୂଚୀ ପାଇଁ ଆନ୍ଦୋଳନର ନେତୃତ୍ୱ ନେଉଥିବା LAB ଏବଂ KDA ସଂଗଠନର ମିଳିତ ଡାକରାରେ କାରଗିଲ ଏବଂ ଦ୍ରାସରେ ସମ୍ପୂର୍ଣ୍ଣ ବନ୍ଦ ପାଳନ କରାଯାଇଥିଲା।
ଲଦାଖ ପୋଲିସ ମହାନିର୍ଦ୍ଦେଶକ ମୁକେଶ ସିଂହ ଲେହର ସିଙ୍ଗେ ନାମଗ୍ୟାଲ ଚୌକରେ ରାଲି ସ୍ଥଳ ପରିଦର୍ଶନ କରି ସୁରକ୍ଷା ବ୍ୟବସ୍ଥା ସମୀକ୍ଷା କରିଥିଲେ। ସହରରେ ଆଇନ ଶୃଙ୍ଖଳା ବଜାୟ ରଖିବା ପାଇଁ ଅତିରିକ୍ତ ପୋଲିସ ଏବଂ ସୁରକ୍ଷା ବାହିନୀ ମୁତୟନ କରାଯାଇଥିଲା। ଅଧିକାରୀଙ୍କ ଅନୁଯାୟୀ, କୌଣସି ସ୍ଥାନରୁ କୌଣସି ଅପ୍ରୀତିକର ଘଟଣା ଘଟିନାହିଁ।
