ରାଜ୍ୟରେ ଘନ କୁହୁଡି ଆସ୍ତରଣ, ଆହୁରି ଖସିବ ରାତିର ତାପମାତ୍ରା
ଭୁବନେଶ୍ବର: ଭାରତୀୟ ପାଣିପାଗ ବିଭାଗ (ଆଇଏମଡି) ଆଗାମୀ ୨ ଦିନ ମଧ୍ୟରେ ରାତିର ତାପମାତ୍ରାରେ ୨-୩ ଡିଗ୍ରୀ ହ୍ରାସ ପାଇବାର ପୂର୍ବାନୁମାନ କରିଛି।
ଆସନ୍ତା ୨ ଦିନ ମଧ୍ୟରେ ଓଡ଼ିଶାର ଅନେକ ଜିଲ୍ଲାଗୁଡ଼ିକରେ ରାତିର ତାପମାତ୍ରା ୨-୩ଡିଗ୍ରୀ ସେଲସିୟସ୍ ହ୍ରାସ ପାଇବ ଏବଂ ଆଗାମୀ ୫ ଦିନ ମଧ୍ୟରେ ଏହା ୨-୩ ଡିଗ୍ରୀ ସେଲସିୟସ୍ ବୃଦ୍ଧି ପାଇବ ବୋଲି ଆଇଏମଡି ପକ୍ଷରୁ ଆକଳନ କରାଯାଇଛି।
ଶୁଷ୍କ ପାଗ ମଧ୍ୟରେ ପାଣିପାଗ ସଂସ୍ଥା ବୁଧବାର ସକାଳ ପର୍ଯ୍ୟନ୍ତ କୋରାପୁଟ ଏବଂ ସୁନ୍ଦରଗଡ଼ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ଘନ କୁହୁଡ଼ି ହେବା ନେଇ ସତର୍କ କରିଛି।
ଅପରପକ୍ଷରେ ମାଲେସିଆ ଏବଂ ସଂଲଗ୍ନ ମଲାକ୍କା ଉପରେ ଥିବା ଏକ ଲଘୁଚାପ କ୍ଷେତ୍ର ପଶ୍ଚିମ ଉତ୍ତର-ପଶ୍ଚିମ ଆଡକୁ ଗତି କରିଛି ଏବଂ ଜର୍ଜ ଟାଉନ୍ (ମାଲେସିଆ)ରୁ ପ୍ରାୟ ୭୦ କିଲୋମିଟର ପଶ୍ଚିମରେ, କୁଟା ମକମୁର (ଇଣ୍ଡୋନେସିଆ)ରୁ ୨୯୦ କିଲୋମିଟର ପୂର୍ବରେ, ନାନକୋରି (ନିକୋବାର ଦ୍ୱୀପପୁଞ୍ଜ)ରୁ ୭୪୦ କିଲୋମିଟର ପୂର୍ବ-ଦକ୍ଷିଣପୂର୍ବରେ ଏବଂ କାର୍ ନିକୋବାର (ନିକୋବାର ଦ୍ୱୀପପୁଞ୍ଜ)ରୁ ୮୭୦ କିଲୋମିଟର ପୂର୍ବ-ଦକ୍ଷିଣପୂର୍ବରେ ଏକ ଡିପ୍ରେସନରେ ପରିଣତ ହୋଇଛି। ଏହା ଧୀରେ ଧୀରେ ପଶ୍ଚିମ-ଉତ୍ତରପଶ୍ଚିମ ଆଡକୁ ଗତି କରିବ ଏବଂ ଆଗାମୀ ୪୮ ଘଣ୍ଟା ମଧ୍ୟରେ ଆହୁରି ଘନୀଭୂତ ହେବ ବୋଲି ପାଣିପାଗ ବିଭାଗ ପ୍ରକାଶ କରିଛି।
ଅପରପକ୍ଷେ ଭାରତୀୟ ପାଣିପାଗ ବିଭାଗର ସୂଚନା ଅନୁଯାୟୀ, ପୂର୍ବ କେନ୍ଦ୍ରୀୟ ଏବଂ ସଂଲଗ୍ନ ଉତ୍ତର-ପୂର୍ବ ଆରବସାଗର ଉପରେ ଏକ ଲଘୁଚାପ କ୍ଷେତ୍ର ରହିଛି। ଗାଙ୍ଗେୟ ପଶ୍ଚିମବଙ୍ଗର ଉତ୍ତର ଅଂଶ ଏବଂ ସଂଲଗ୍ନ ଅଞ୍ଚଳ ଉପରେ ଆଉ ଏକ ଲଘୁଚାପ କ୍ଷେତ୍ର ରହିଛି। ଏହା ପ୍ରଭାବରେ ଗୁଜରାଟ, କୋଙ୍କଣ, ଗୋଆ, ମଧ୍ୟ ମହାରାଷ୍ଟ୍ର, ପଶ୍ଚିମବଙ୍ଗ, ସିକିମ୍, ବିହାର ଏବଂ ଉତ୍ତର-ପୂର୍ବ ଅଞ୍ଚଳର ବିଭିନ୍ନ ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି।
