ସମୁଦ୍ର ମଝିରେ ବୁଡ଼ିଗଲା ତେଲ ଟ୍ୟାଙ୍କର, ୧୩ ଭାରତୀୟଙ୍କ ସମେତ ୧୬ ଜଣ କ୍ରୁ ସଦସ୍ୟ ନିଖୋଜ

ନୂଆଦିଲ୍ଲୀ:୧୩ ଜଣ ଭାରତୀୟଙ୍କ ସମେତ ୧୬ ଜଣ କର୍ମଚାରୀଙ୍କୁ ନେଇ ଯାଉଥିବା ଏକ ତେଲ ଟ୍ୟାଙ୍କର ଓମାନ ଉପକୂଳରେ ବୁଡ଼ି ଯାଇଛି ବୋଲି ଦେଶର ସାମୁଦ୍ରିକ ସୁରକ୍ଷା କେନ୍ଦ୍ର ମଙ୍ଗଳବାର କହିଛି। କ୍ରୁ ମେମ୍ବର ନିଖୋଜ ଅଛନ୍ତି ଏବଂ ସେମାନଙ୍କୁ ଖୋଜିବା ପାଇଁ ଉଦ୍ଧାର କାର୍ଯ୍ୟ ଜାରି ରହିଛି ।

ତେଲ ଟ୍ୟାଙ୍କର ‘ପ୍ରେଷ୍ଟିଜ୍ ଫାଲକନ୍’ରେ ୧୩ ଜଣ ଭାରତୀୟ ଏବଂ ୩ ଜଣ ଶ୍ରୀଲଙ୍କା ନାଗରିକ ଥିଲେ। ସୋମବାର ଦିନ ଓମାନି ବନ୍ଦର ଡୁକ୍ମ ନିକଟରେ ରାସ ମଦରାକାଠାରୁ ୨୫ ନଟିକାଲ ମାଇଲ ଦକ୍ଷିଣ-ପୂର୍ବଦିଗରେ ଏହି ଜାହାଜଟି ବୁଡ଼ି ଯାଇଥିଛି।

ଏଲଏସଇଜିର ଜାହାଜ ଚଳାଚଳ ତଥ୍ୟ ଅନୁଯାୟୀ ଟ୍ୟାଙ୍କରଟି ୟେମେନର ଆଡେନ ବନ୍ଦର ଅଭିମୁଖେ ଯାଉଥିଲା। ଓମାନର ସାମୁଦ୍ରିକ ସୁରକ୍ଷା କେନ୍ଦ୍ର ଖବର ସରବରାହ ସଂସ୍ଥା ରଏଟର୍ସକୁ କହିଛି ଯେ ତୈଳ ଟ୍ୟାଙ୍କରଟି ପାଣିରେ ବୁଡିଯିବା ପରେ ଓଲଟି ପଡ଼ିଛି। ତେବେ ଜାହାଜଟି ସ୍ଥିର ରହିଛି ନା ସମୁଦ୍ରରେ ତେଲ କିମ୍ବା ତୈଳ ଜାତ ଦ୍ରବ୍ୟ ଲିକ୍ ହେଉଛି ତାହା ସ୍ପଷ୍ଟ ହୋଇନାହିଁ।

ଏହି ଜାହାଜଟି ୨୦୦୭ରେ ନିର୍ମିତ ୧୧୭ ମିଟର ଲମ୍ବା ତୈଳ ଉତ୍ପାଦ ଟ୍ୟାଙ୍କର ବୋଲି ଏଲଏସଇଜିର ଜାହାଜ ଚଳାଚଳ ତଥ୍ୟରୁ ଜଣାପଡିଛି । ଏଭଳି କ୍ଷୁଦ୍ର ଟ୍ୟାଙ୍କରକୁ ସାଧାରଣତଃ ଅଳ୍ପ ଯାତ୍ରା ପାଇଁ ନିୟୋଜିତ କରାଯାଏ ।

ଡୁକ୍ମ ବନ୍ଦର ଓମାନର ଦକ୍ଷିଣ-ପଶ୍ଚିମ ଉପକୂଳରେ ଅବସ୍ଥିତ, ଯାହା ଦେଶର ପ୍ରମୁଖ ତୈଳ ଓ ଗ୍ୟାସ ଖଣି ପ୍ରକଳ୍ପର ଏକ ପ୍ରମୁଖ କେନ୍ଦ୍ର । ଏକ ପ୍ରମୁଖ ତୈଳ ବିଶୋଧନାଗାର ଦୁକ୍ମର ବିଶାଳ ଶିଳ୍ପାଞ୍ଚଳର ଏକ ଅଂଶ, ଯାହା କି ରାଜ୍ୟର ସର୍ବବୃହତ ଏକକ ଅର୍ଥନୈତିକ ପ୍ରକଳ୍ପ।